ഈ പശുവിന്റെ ഉയരം ആറ് അടി നാല് ഇഞ്ച്

ഈ പശുവിന്റെ ഉയരം ആറ് അടി നാല് ഇഞ്ച് ഇല്ലിനോയിസ് (അമേരിക്ക):  ഇത് ബ്ലോസം. പതിമൂന്ന് വയസുള്ള ഈ പശു ഉയരത്തിന്റെ കാര്യത്തിൽ പുലിയാണ്. ആറ് അടി നാല് ഇഞ്ചാണ് പശുവിന്റെ ഉയരം. ബ്ലോസം ലോകത്തിലെ ഏറ്റവും ഉയരമുള്ള പശുവാണെന്നാണ് ഗിന്നസ് ബുക്ക് ഓഫ് റെക്കോർഡ്സ് രേഖപ്പെടുത്തിയിരിക്കുന്നത്. ഓറഞ്ച്‌വില്ലയിലെ ഫാം ഉടമസ്ഥയായ പാറ്റി ഹാൻസണാണ് ഹോൾസ്റ്റീൻ ഫ്രീസിയൻ വംശത്തിൽപ്പെട്ട ബ്ലോസത്തിന്റെ ഉടമസ്ഥ. മൃഗഡോക്ടർമാർ പശുവിന്റെ ഭാരം 2000 പൗണ്ട് (907 കിലോഗ്രാം) ആണെന്ന് രേഖപ്പെടുത്തി.  ആഗസ്റ്റ് മദ്ധ്യത്തോടെയാണ് ബ്ലോസത്തിന് ഗിന്നസ് റെക്കോർഡ് ലഭിച്ചതായുള്ള ഇമെയിൽ സന്ദേശം പാറ്റിയ്ക്ക് ലഭിച്ചത്. അടുത്തിടെ പാറ്റിയും ബ്ലോസമും ഒരുമിച്ച് ഫോട്ടോ ഷൂട്ടും നടത്തിയിരുന്നു. ബ്ലോസം പ്രത്യേകത നിറഞ്ഞ പശുവാണെന്ന് അവൻ കിടാവായിരുന്നപ്പോഴെ തനിക്ക് അറിയാമായിരുന്നെന്ന് പാറ്റി പറയുന്നു. ഈ പശുവിന് പ്രസവിക്കാനാവില്ലെന്ന് മനസ്സിലാക്കിയപ്പോൾ അതിനെ അറവുശാലയിൽ കൊടുക്കാതെ അരുമയായി വളർത്താനാണ് ഇവർ തീരുമാനിച്ചത്. തന്റെ ഫാമിന്റെ അഭിമാനമാണ് ബ്ലോസമെന്നാണ് പാറ്റി പറയുന്നത്. തന്റെ അതിഥികളെയെല്ലാം പശുവിനെ കാണിച്ചു കൊടുക്കാറുണ്ടെന്നും അവരെയെല്ലാം കാണുന്നത് ബ്ലോസത്തിന് വളരെ ഇഷ്ടമാണെന്നും അവർ പറഞ്ഞു. ബ്ലോസം വളരെ പ്രസിദ്ധയാണ്. സ്വന്തമായി അവൾക്ക് ഫേസ്ബുക്ക് പേജ് വരെയുണ്ട്.  ഈ ജൂലൈയിൽ പതിമൂന്ന് വയസ് തികഞ്ഞ തന്റെ പ്രിയപ്പെട്ട പശുവിന്റെ കഥ കുട്ടികളുടെ പുസ്തകമാക്കണമെന്നും പാറ്റി ഹാൻസണിന് ആഗ്രഹമുണ്ട്. ഗിന്നസ് ബുക്ക് അനുസരിച്ച് ഏറ്റവും ചെറിയ പശു ഫ്ലോറിഡയിലുള്ള ബ്ലേസ് ആണ്. വെറും രണ്ട് അടി 3.19 ഇഞ്ചാണ് ബ്ലേസിന്റെ നീളം.